Revelation of John 20
Misakisakii Satani Muxolu Tauu Ie Itemaxu Mavolovexa Ta'uve (1,000)
1 aIoxe eni emaisou mimii ne mukalu xe emalei la, la emaisou angelo vile molu teitexi no loxotolo mulu'e. Anu mulu'e la mutetelisou siliko sou aitenga sou taxa veveeni xe lamota aeni toxoxa'a. 2 bAnu muavuti la mutetelisou iaulu toxoxa'a ne xe mukalu la musakisakiinu muxolu tauu ie itemaxu mavulovexa ta'uve (1,000). Anu iaulu toxoxa'a ne anu iaulu sou tatei mo ulee masua xe Satani. 3Angelo ne muavuti la muleanu mulu'e no anu taxa e mulai no lia manina xe mukalu la musilikonu aitenga xe musakisakiinu mo sou umomomo sou ukisiinu la utelo sou u'oxonu loloxa'a ta mitema no tuatuala no xalexalee lia 'o la uasi. Anu uxolu ne ulai uxali no mine tauu ie itemaxu mavulovexa ta'uve ukalu la ilulusou ia umomomo sou uxolu maxuveeni uasi.4 cMo eni emaisou puloulousi'a ta tatanaanu tuatuala tavu'alo muta'olu mo ane'i ane mixolu no puloulou ne mino'u xavi sou ixaxai sou itulusi'a ta mitema no anu vaivaikala. Mo eni emaisou uleene'i ta mitema e mixotosou xolane'i la misoisoli xo mia'aloxu vaikala manina noxou Iesu mo noxou Lataua. Ane'i ane no ilotu noxou mii vova mo no anu mii e mipuinu iou loxo anu ne uasi. Xe ino'u sosovo noxou mii vova no 'ala'alaie'i mo avo'a uasi. Eni emaisi'a ta mitema ne mixolu mimauli la mo ilo'a Kalisito mixaxai loxo ta tatanaanu tuatuala mumomomo loxo tauu ie itemaxu mavulovexa ta'uve (1,000). 5Anu voxo sou ta mitema misoisoli itulu vile ane. Ia ta mitema latala e misoisoli ne itulu uasi miainesi xo mole tauu ie itemaxu mavulovexa ta'uve ne mukalu. 6 dLa sou ane'i ane misoisoli ia mitulu no anu voxo sou itulu ne la, ane'i i'osa xo Lataua musosovosi'a lexe anu ta na'u mo ualusi'a la soli ta tameisou umomomo sou utaloxolixa'a la uasi. La ane'i ixali ta aili'i noxou Lataua mo Kalisito mo ilo'a Kalisito ixaxai ipita loxo ta tatanaanu tuatuala ulai uxali tauu ie itemaxu mavulovexa ta'uve ukalu.
Mikalusou Satani a Vile
7Ioxe no anu tauu ie itemaxu mavulovexa ta'uve ukalu la ilulusou Satani no anu taasou navunavu ne. 8 eLa ulai u'oxonu loloxa'a ta mitema no xalexalee tuatuala no anu atume iou tami'a no lia 'o ukalusi. Ane'i ta mitema ne Xoxu ilou Maxoxu mipitane'i sou lexe i'oto la itiitisi'a mumomomo loxo io'i no luaki pa'umolu. 9 fAne'i miavuti la milutu no xalexalee no lia la mine'e mipita sou milutu milai mixoxosou tuala tatila noxou Lataua e anu mumasaxau misevile ilo'a ta mitema noxou. Ia navu molu teitexi no loxotolo mulu'e la mu'elaxa'a mukalusi. 10 gIa anu ulee masua e mu'oxonu loloxa'a ta mitema ne mileanu mulai no anu kupaxu navu mo taupea e mileane'i mii vova ilou itema sou palomatana kalakalavoi milu'e no anu tei. La ane'i tatalu ne ixolu mo ino'u navunavu no aso mo no 'olovoxo xe utotomu mo kaluxu uasi.Voxo sou ta Mitema Itulu no Anu Vaivaikala
11Xe eni emalei la, la emaisou puloulou kea vile toxoxa'a muxolu, mo emaisou itema e muxolu no anu ne. Anu muxolu la lia ilou loxotolo mu'ume mulai tasiauxu avile. 12 hMo eni emaisi'a ta mitema ta tatila ilo'a ta mitema e ualasi'a uasi misoisoli mine'e mipita no talaxu itema e muxolu no puloulou ne. La emaisou mixavulalanu lavuku se'i vile sou mauli xe se'i sou mikaukavunu 'ili'ilixo noxi'a ta mitema no anu. La sou itema e muxolu no puloulou ne umaisou 'ilixo ma'ia muai no nano no lavuku ne la sou anu utulusi'a no anu vaivaikala la ino'u 'ulusou. 13 iLuaki mulivulixa'a ane'i ane misoisoli mo mixolu no anu milai xe soli ilou tuala sou soli mulivulixa'a ane'i ane misoisoli la mixolu noxi'a mulai sou ane'i vilevilesi itulu no anu vaivaikala la ino'u lakolisou mii ma'ia anu mu'oxonu. 14Xe mukalu la emaisi'a soli ilou tuala sou soli ne mileane'i ilou milu'e no anu navu kupaxu. Anu navu kupaxu ne anu soli ta tameisou ane. 15La sou lexe anu ane imaisou ualasou ikaukavunu uai no nano no anu lavuku sou mauli uasi la ileanu ulai no navu kupaxu ne.
Copyright information for
ATA